जून २९ तारिख खुनु गौरबयाः (प्राइद परेद)

कुएर ल्यायेमि पुचः (Queer Youth Group) थ्व हे नेपाल सम्बत ११३९ तछलागाः एकादसि अर्थात् जून २९ खुनु सुथय् १० बजे निसें फिब्वःख्यः (माइतीघर मण्डला)सं गौरबयाः (Pride Parade) न्यायेके त्यनागु जानकारी बियाच्वना। न्हापां फिब्वःख्यलय् मुनां र्यालि यासें खुन्थू (नयाँ बानेश्वर)सं क्वचायेकेगु जुइ।

गौरबयाः, अङ्ग्रेजी भासं Pride Parade, हलिं यङ्क जाः व यचा म्ह्वःल्याः (यौनिक तथा लैङ्गिक अल्पसङ्ख्यक) अधिकारया नितिं याइगु र्याली खः। जाः व यचा म्ह्वःल्याः अथबा कुएर मनूतयेगु दृश्यता, तःताजी जाः व यचा म्हसिकातयेगु उत्सव व थःगु अधिकारया नितिं संघर्षया कथं गौरबयाः नायेकी। जून महिनायातः देसंदे गौरबला (International Pride Month) धकाः हनिं। हलिं यङ्क थ्व हे लच्छिइ थिथि देसय् गौरबयाः न्यायेकी। अज्याःगु समाज गन निथी जक्क यचिं (लिङ्ग)यातः मान्यता बी, निथी जक्क जाः म्हसिका (लैङ्गिक पहिचान)यातः जक्क थाय् बी अलय् अःखः जाः पाखे जुइगु आकर्षणयातः जक्क सामान्य धकाः धाइ, उगु समाजय् यचिं (लिङ्ग), जाः (लैङ्गिकता) व यचा क्वसाः (यौन अभिमुखिकरण) तःताजि कथंया दै धकाः सीकाबीगु नितिं, जनचेतना ब्वलङ्केगु नितिं व थःगु हक हितया नितिं थ्व गौरबयाः नायेकी।

सन् १९६९ सं अमेरिकाया न्यू योर्क सहरय् दूगु स्तोनवाल धाःगु होतेल न्ह्यःने जूगु आन्दोलनं गौरबयाः न्यायेकेगु परम्परा न्ह्याःगु खः। समाजय् थिथि कथंया लान्छनां कीकेमाःगु जुयाः थःगु अधिकारया नितिं सः ब्वलङ्केगु ज्या न्ह्याकूगु गौरबयाः पाखें हलिमय् कुएर (जाः व यचा म्ह्वःल्याः)तयेगु अधिकारया सवालय् यक्व ताःतुना पूवंगु दु। दच्छि ई दुने जाः व यचा म्ह्वःल्याः बारे थिथि कथंया ज्याझ्वःत हना वःसां गौरबला खुनु गौरबयाः न्यायेकेगु ज्या धाःसा नेपालय् थ्व न्हापांगु खः। थ्व गौरबयाः २५दँ सिबें क्वकलिपिनेगु नायःसुइ न्यायेकेत्यनागु खः।

थुगुसिइ झीगु नारा थुगु कथं दु : “राज्यया फुक्क तगिं तगिंसं व क्वःछिनाया ज्याथाय् (निर्णायक भूमीकासं) जाः व यचा म्ह्वःल्याःतयेतः दुथ्याकाः ब्वति कायेके”छ। नेपालया संविधानय् जाः व यचा म्ह्वःल्याः धकाः च्वयातःगु दुसां राज्यया छुं नं निकाय बा तगिमय् झीतः दुथ्यकाःतःगु मदु। क्वःछिनाया ज्याथाय् (निर्णायिक भूमीका)सं गनं दुथ्याकाःमतःगुलिं दयेकाच्वंगु ऐन, कानुन व नीति नियमत छुकें नं झीगु मुद्दात सम्बोधन मजू। झीगु नितिं ऐन कानुनय् गनं ल्वयेक व्यवस्था नं याना मतः। अथे जुयाः क्वःछिनाया ज्याथाय् (निर्णायक भूमीका)य् ज्वलिंज्वयेक दुथ्याकेमाः धैगुय झीगु सः खः।

कुएर ल्यायेमि पुचः थःयातः जाः व यचा म्ह्वःल्याः दुनेया थिथि म्हसिकात मध्ये म्हसिका बीपिं ल्यायेमि (युवा)तयेगु छता गैर-दर्तित पुचः खः। सन् २०१९या सुरुवात निसें थुकेया पलिस्था जुल। थुगु पुचलं जाः व यचा म्ह्वःल्याः अधिकारया नितिं वकालत यासें जनचेतना ब्वलङ्केगु ज्या याइ।

झीगु फेसबुक पेज : https://www.facebook.com/NepalPrideParade/
हाय्‌सताय्‌ग : #NepalPrideParade#गौरव्यात्रा#गौरबयाः
फेसबुक इभेन्त : https://www.facebook.com/events/2378401215513951/

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s